Portrait vun een Mitglied vun uns Theaterspeelers

 

Kuum to glöven, wi schnell so een Johr vergeiht ...

Düt Johr mok ik mi op`n Padd un besök, nich direkt een vun uns Speelers, sünnern een vun de wichtigsten Lüüd achter de Bühn.

Vundag geiht dat to Rolf Schuran oder bedder seggt to un`s Technik-Rolf.

Rolf is an 20.3.1968 geburn un in Öbergünn bi Buxthu opwussen. Langwielig würr dat bi Schurans in Huus bestimmt nich. Luise und Gerhard Schuran harrn mit veer Kinner alle Hannen vull to doon. Uns Technik-Rolf hett nämlich noch dree Geschwister Hans-Gerhard (1963), Ulrike (1964) un Rainer (1965).

Rolf Schuran

Natürlich müss de lütte Rolf ok to School gahn un hett mit siene schoolische Karriere in de Grundschool Altkloster anfungen. Dornoh güng he op de Orientierungsstufe nah Buxthu in dat Schulzentrum Nord un denn wieder op de Hauptschool, de würr jo ok gliecks dor. As Rolf denn 1984 sien Afschluss in`ne Tasch harr, hett he een Lehre as Muurmann bi dat Bauunternehmen Peter Spark in Buxthu anfungen. Tja un wat schall ik jo seggen, Rolf is nu mol een treue Seele, un is dor denn ok 20 Johr bleven. Solang bit de Firma dicht mokt hett.

1989 op`n Schüttenfest in Öbergünn hett Rolf denn siene Ramona kennenliernt. Ramona Peters un Rolf brucken denn ok nich lang öberleggen. Wi blievt tosommen! Un so kemm Rolli, wi Ramona ehrn Rolf giern mol nömmt, nah Ilstörp. Heirot heppt de Beiden 1995 und schwupp di wupp 1996 is jümmer Söhn Timo to Welt kummen und dree Johr later 1999 kem noch een lütte Deern achterran, Carolin. De Familie würr nu komplett.

Rolf is een Mann, de anpacken kann, de jümmers goode Ideen hett un jümmers wat to`n rümpusseln un basteln find. So würr dat denn ok perfekt, as de Grundschool in Ilstöp een Huusmeister söcken de. Un wiel Rolf ok in de Füürwehr un in Schüttenverein aktiv is, is dat ok de Gemeen licht full`n , sik för Rolf as Huusmeister to entscheden. Tja, un so is Herr Schuran oder Herr Schulran, wi ehm so manch lütten Schöler nömmt, siet 2004 an de Grundscholl in Ilstörp un dor nich mehr wech to denken.

Rolf is een Huusmeister, wi he im Buche steiht und jümmers mit „Leib und Seele“ bi siene School. Een schönet Geföhl för em würr dat denn ok, as he dor anfungen is, dat siene Kinner dor noch op de Grundschool gahn sünd. Un viellicht, keen weet dat al, is „Herr Schulran“ jo ok Huusmeister, wenn seine Enkelkinner inschoolt ward.

Een Highlight givt dat för de Schölers jedet Johr beför de Sommerferien anfangt, dann dröft de Schöler, de nah de veerten Klass, von de Grundschool afgaht, Herrn Schuran mit „Waterbomben“ afschmieten. Dat gift dann jümmers een grodet Gejohle op`n den ganzen Schoolhof. 

Ok sünd de Faschingskostüme von Herrn „Schulran“ lengendär. So kun man Rolf al as opblasten Football, Mr. Indcredible un sogor as Handy dörch de School lopen seihn. Rolf siene Kostüme, find jümmers groden Bifall. Die Kinner mögt ehren Huusmeister so giern, dat sogor mol een Schöler as Herr Schuran to´n Fasching kommen is. Wenn dat man kein Kompliment is!?

Rolf is een Huusmeister, wi he im Buche steiht und jümmers mit „Leib und Seele“ bi siene School. Een schönet Geföhl för em würr dat denn ok, as he 2004 dor anfungen is, dat seine Kinner dor noch op de Grundschool gahn sünd. Un viellicht, keen weet dat al, is „Herr Schulran“ jo ok Huusmeister, wenn seine Enkelkinner inschoolt ward.

Nu kem denn ok bald de Tiet, dat de Theotergruppe vun de Gaststuv Meinschien in de Mehrzweckhalle nah Ilstörp ümtrecken müss. Wi alle wüürn eerst so`n bedden skeptisch, ober uns Technik-Heinz hett sik schnell mit den Huusmeister anfrünt un so wüür denn ut den Huusmeister Herr Schuran bald ok de neie Technik-Rolf. Heinz hett ehm good anliernt, besüüners de veelen Bespreckungen hebbt em dorbi holpen. Siet 2013 bi dat Stück „Aantenkrieg“ höört Rollo fast to uns Truppe. He managt de Termine mit de Gemeen, Rolli givt Bescheed, wann wi de Halle brukt un so kommt dat denn ok.  

Meistiets sitt he bi de Proven dorbi un grient sik een. Em entgeiht nix! Wenn wi seggt, wi bruukt een Gardrobe oder noch een Schalter mehr oder oder ... bi de nächste Prov is dat dor. Rolf kriegt allens hin. Unmöglich!? Givt dat för Rolf nich.

Allens op Krankenschien

Ok wenn de Regie wedder mol een splienige Idee hett. So as bi dat Stück „Klaut wi doch gliecks de ganze Bank“. Dat Stück speel op een Camingplatz. Un de Gedanke vun richtige Wohnwogens op de Bühne würr an sich schon mol groodoordig ober wohl doch eher schwierig ümtosetten. Ober doch nich för Technik-Rolf. De hett koortthannig in Internet een ollen afwrackten Wohnwogen funn. Dat ole Dings kunn ober nich mehr achtern Wogen bammelt warn. Also is he mit sein Schwager Frank Peters mit`n Hänger los neiht un hett den kaputten Wohnwogen holt. Tohus hett he den Wohnwogen in dree Dele sagt un so op de Bühne stellt, dat dat för dat Publikum so utseihn hett, as stünn dor doch tatsächlich dree Wohnwogens op de Bühn. Dat gev dann ok ordentlich Applaus vör dat Bühnenbild. Mien leeve Rolf in Bühnenbau un in dat ümsetten vun diene un uns Ideen büst du eenmalig.

Bühnenbild: Klaut wi doch glieks de ganze Bank

Ik will ok an düsse Steed mol een Danke an uns annere Bühnenbauer seggen, de jümmers flink un mit veel Elan dorbi sünd. Also, Dankeschön Jungs!

Rolf is mit Leidenschaft op sien Rad ünnerwegens un dat nich blots in Ilstörp. Nee, he makt groode Tourn dörch dat ganze Land. So radelt he denn ok mol schnell in een Week 700 km bi de Rhein-Mosel-Tour oder de Elbwanderwech ward erforscht. Dat, un dor besteiht Rolf op: „Alles ohne E-Antrieb!“

He is veel as Sportschütze un mit de Füürwehr ünnerwegens. Een grode Leidenschaft vun Rolf un Ramona is mit jümmern Wohnwogen op Campingtour to gahn. 

Een Deel givt dat, wo Rolli sien Hart höger sleit, dat is wenn he vun „sienen“ Footbalvereen schnackt: Borussia Mönchengladbach! Wenn ji to de Wiehnachtstied mol nah Ilstörp rinföhrt, dann kiekt man mol op dat Grundstück vun Schurans. Dor steiht keen Rentier dat dörch dat ganze Dörp lüchten deiht. Nee, dor steiht een riesen groodet „B“ in Gorn un blinckt un glitzert. Rolli lett dat groode „B“ bit wiet in neiget Johr rin dor stohn. Natürlich ist dat Wappen vun Gladbach sülbst baut un opstellt vun un`s Rolf.

So is dat denn ok nich verwunnerlich, dat he op mien Fraag, wat he sik för de Tokunft wünscht, mit een twinkern in Oog antert: „Gladbach muss Meister werden! Auf jeden Fall muss Gladbach immer VOR dem HSV stehen!“ Un grient dor bi verschmitzt vör sik hin.

Dann ward uns Rolf ober doch noch mol Eernst. „Ich wünsche meiner Familie und mir Gesundheit und Glück und das alles so bleibt wie es ist. Hier fühle ich mich wohl.“ Nach koortem Tögern fügt he noch to: „Jeder sollte für den dörflichen Zusammenhalt und das Dorfleben etwas tun, denn das ist unser Zuhause.“ 

Rolf du büst eenmalig un dat mokt jümmers Spoß mit di, ok wenn du af un an koort daför büst de Regie to`n Mond to scheten, bilvst du jümmers ruhig un eben uns Technik-Rolf, de mit siene Ideen eenfach nicht o ersetten is.

Schön, dat du to uns Truppe höörst, un keen weet, viellicht steihst du jo bald mol op de Bühne un nich achterto bi de Technik.

 

(Heike Meyer)